Халықаралық «ORDA» жоғары колледжінде WorldSkills Kazakhstan талаптарына сәйкес «Демонстрациялық емтихан: дайындау, ұйымдастыру, өткізу» тақырыбында мазмұнды әрі тәжірибелік маңызы жоғары семинар ұйымдастырылды. Бұл семинар білім беру сапасын арттыруға бағытталған жұмыстардың бірі ретінде ерекшеленді.

Семинар барысында демонстрациялық емтиханның білім алушылардың кәсіби деңгейін әділ әрі нақты бағалаудағы рөлі кеңінен қарастырылды. Аталған формат – тек теориялық білімді емес, нақты практикалық дағдылар мен кәсіби құзыреттіліктерді анықтаудың тиімді құралы екені атап өтілді. Сонымен қатар, білім беру бағдарламаларын меңгеру деңгейін жүйелі түрде саралап, халықаралық стандарттарға сәйкестігін қамтамасыз ету мәселелері де назардан тыс қалмады.

Іс-шара аясында колледж директорының оқу-әдістемелік жұмысы жөніндегі орынбасары Тажикова Г.Д. қатысушыларды демонстрациялық емтиханды ұйымдастыру және өткізу талаптарымен жан-жақты таныстырды. Оның ішінде нормативтік-құқықтық негіздер, емтихан кезеңдерінің құрылымы, бағалау критерийлері, сарапшылардың қызметі, сондай-ақ инфрақұрылымды тиімді дайындау мен емтихан өткізу тәртібі нақты мысалдар арқылы түсіндірілді.